Pagmulat

 

Ang The Awakening ay isang album ng American jazz pianist na si Ahmad Jamal na nagtatampok ng mga pagtatanghal na naitala noong 1970 para sa Impulse! label. Sa pagtingin sa nakaraan, ang album ay nagkaroon ng impluwensya sa kultura at produksyon ng Hip hop music, kung saan ang mga artist tulad nina Nas at Common ay kumopya ng mga kanta mula sa album para sa kanilang mga gawa.

Isa pang tula nung 2017 hahaha. Enjoyy~

PAGMULAT

ikaw ang unang naisip ngayong umaga

bago maidlip ikaw din ang huling nakita

mga litrato mong kay sarap titigan

damdamin ko'y sadyang napapagaan

ilang umaga na ding nagigising sa iyong mga ngiti

tila ba naririnig ko ang iyong magandang pagbati

kakaibang saya ang aking nararamdaman

habang kinakausap ka ng hindi mo alam

minsan nangangarap na ako'y iyong naririnig

na sana'y dalhin ng hangin ang aking mga tinig

kaso sa ganito pa lang, labis nang naaantig

mangyari pa kaya'y baka di kayanin ang kilig

o sa bawat pagkakataong ako'y nagigising

parang laging natutupad ang aking mga hiling

hinding hindi magsasawa ang puso ko

ikaw na nga ang hinahanap ko

Puyat

 

Isa ito sa mga album ni Neddie na pinamagatang Sleep-Deprived na nairelease noong Hunyo 29, 2024. Ito ay isang lush DnB na puno ng damdamin at pakiramdam ng hiwaga. Parang kaya kong matulog habang pinapakinggan ang EP na ito.

Ito ay some time nung 2017 din. <3

PUYAT

akala ko kung ano na

inabutan lang pala ako ng umaga

wala namang bago, wala namang iba

ganito pa rin. iniisip ka

kadalasan ay hindi na malinaw

di naman magkahawak pero di bumibitaw

pinagpawisan na nga din tayo sa ginaw

madalas hinahanap pa ang araw

teka. ano ba tong aking mga sinasabi

para bang ang utak ko'y walang silbi

wala naman akong ginawa kundi mabighani kada gabi

habang inaalala nung siya'y nakatabi

puso't isipan ko'y parang sumasabog

palibhasa sa panaginip lang ako nakakatulog

ginagawang gabay ang mga tugtog

habang ang oras ay nasusunog

at sa mga abo nitong tinatangay ng hangin

ay para bang mas lumalalim

hindi lang pala alaala ang kinikimkim

ang hinaharap ay pinapangarap ko na din

Nahuhulog

Ang All We Know Is Falling ay ang debut studio album ng American rock band na Paramore, na inilabas noong Hulyo 26, 2005, sa ilalim ng Atlantic-distributed Fueled by Ramen sa Estados Unidos. Karamihan ay nakategorya bilang pop-punk album, nakatanggap ang album ng karamihan sa mga positibong pagsusuri at tinaguriang 'scene classic.'

So among the sadboi tula ko before, meron pala akong nagawang hindi sad. Hahaha circa 2017 din to.

NAHUHULOG

Ang ating pag-ibig parang taglamig at tag-init

Ang ating pag-ibig parang makulimlim at banayad na langit

Ang ating pag-ibig parang pagsikat ng araw

Ang ating pag-ibig parang isang malaking sugal

Wag mo akong hayaang matalo

Ako'y lalong nahuhulog sa'yo

Ang puso mo sa akin ay umaawit

Ang puso mo sa akin ay  nakapanakit

Ang puso mo'y dinala ako sa kalangitan

Ang puso mo'y nagbigay ng tunay na kaligayahan

Ano na ang gagawin ko?

Ako'y lalong nahuhulog sa'yo

Paminsan minsan ay di nagkakaunawaan

Sa bawat araw ay bagong karanasan

Sa ngalan ng ating pagmamahalan

Pareho tayong may pagkukulang

Ngunit lagi mong tatandaan

Lahat ng iyong pagkakamali at pagkukulang

Ay aangkinin ko gaya ng pagtanggap ko sa'yo

Ako'y lalong nahuhulog sa'yo

At bigla bigla na lang..

Ang aking bawat hininga

Ang aking bawat nadarama

Lahat ay para sa iyo.

At tulad mo

Na naging para sa akin

Wala ng ibang hihilingin.

Walang makakasalo sa akin gaya ng pagsalo mo

Ako'y lalong nahuhulog sa'yo

Lahat ng nakikita ko ay tungkol sa'yo

Lahat ng nararamdaman ko ay para sa'yo

Ang buong ikaw ay para sa akin

Ang buong ako ay para sa'yo

Sige lang mahulog ka lang sa akin

Dahil ako'y lalong nahuhulog sa'yo

Ang Bangin

 

Ang Cliff ay ang 1959 debut album ng British singer na si Cliff Richard at ng kanyang banda na The Drifters. Ang album ay isang live-in-the-studio na pag-record ng maagang rock and roll nina Richard at ng Shadows sa harap ng isang inanyayahang audience na may ilang daang tagahanga. Ito ay naitala sa loob ng dalawang gabi noong Pebrero 1959 sa Studio 2 ng EMI Recording Studios.

Ito paborito kong nasulat noon. Like 2017 din hahaha. Di ko na din maalala yung kwento kung bakit ko to nasulat. Hahaha

ANG BANGIN

At ngayon, tayong dalawa'y nasa bangin

Ika'y nasa taas at ako'y nakalambitin

Tanging ikaw ang sumusuporta sa akin

Para hindi ako kainin ng dilim sa ilalim

Mahigpit akong nakakapit sa iyong braso

Ganun din kahigpit ang mga kapit mo

Ginagawa mo ang lahat para hindi ako malaglag

Nagtitiwala nang tapat ngunit puso ko'y di mapanatag

Sa isang kisapmata, ang lahat ay nag-iba

Ako na lang pala ang nakakapit sa ating dalawa

Ayaw mo na ba? Pagod ka na? Bakit bumibitaw ka na?

Ang isip ko'y binaha ng pagtataka

Naalala ko bigla ang mga masasayang sandali

Ang iyong nakakahawang tawa, matatamis na ngiti

Ang iyong mga matang tinititigan ko nang walang sawa

Ngayo'y nakatingin sa mga mata kong nagmamakaawa

Nag-aalangan ngayon ang isip ko't damdamin

Di ko alam kung alin ang aking uunahin

Alam kong nahihirapan ka na sa kalagayan natin

Ngunit ayoko namang mahulog sa nagbabadyang dilim

Maaari ka bang mapagod sa pagbitiw

Sumusuko ka na ba sa atin, o giliw

Mauuna ba akong mapapagod sa pagkapit

Alam kong ang kasagutan ko'y nalalapit

At sa isang iglap, bumalik sa akin ang lahat

Matataas na pangarap, mga away na walang awat

Mga pagsubok na ating napagtanto

Mga nag-udyok kung bakit tayo nagkaganito

Hindi nagdadalawang isip na ako'y bumitaw sa iyong bisig

Mawalay ka man sa akin, ngunit hindi ang aking pag-ibig

Ako'y pumikit at hinanda ang puso kong nangangamba

Pinapakawalan na kita sa bigat na iyong nadarama

Siguro, sa kadiliman ng ating mga duda at katanungan

Sa ilalim ng katarikan, matatagpuan ating mga kasagutan

Maaaring ito rin ay sigaw ng iyong puso't isipan

Kaya nung kita'y pinakawalan, sumunod ka ng walang alinlangan.

Huli

Ang The Final ay isang greatest hits album na inilabas noong 1986 upang buuin ang karera ng English pop duo na Wham!. Ang album ay hindi agad inilabas sa North America, kung saan ang album na Music from the Edge of Heaven ang inilabas sa halip. Anim na kanta mula sa album na iyon ay lumabas sa compilation na ito. Ang compilation album ay sabay na inilabas sa farewell concert na may parehong pangalan noong Hunyo 28, 1986, sa Wembley Stadium.

Soooo. Another sadboi tula nung 2017. HAHAHAHA.

HULI

maginaw na pagtrato

walang ganang mga tono

unti unti kang nagbago

biglaan akong nanibago

ako ang may gawa

wala namang ginawa

kaya wala ng magagawa

gusto mo ng mawala

patawad sa aking kasalanan

oo. patawad na naman.

patawad na lagi mong napapakinggan

hanggang sa mga patawad na lang

pero hayaan mo ito na ang huli

di mo na kailangan mag atubili

di mo na kailangan makipag ayos

ako na ang magtatapos

sa'yo ko nilalaan ang ang aking huling tula

natuyo na ng hangin ang huling patak ng luha

salamat sa alaala at sa damdaming pansamantala

magpapaalam na ako sa iyong sistema

malaya ka na sa aking pang aabala

Kusa

 

Ang Spontaneous ay isang live album ng bassist at kompositor na si William Parker kasama ang kanyang Little Huey Creative Music Orchestra, na naitala sa Vision Festival sa New York noong 2002 at inilabas sa Italian Splasc(H) label

So ito another old tula of mine. Way back 2017. Hahahaha. Sana maenjoy mo.

KUSA

Gaano katagal na ba

Mula nung huling beses

Nadinig ang musika

Walang kapares

Ang mahika

Ng iyong boses

Na tila ba

Isang senyales

Na tapos na

Ang pagtitiis

At hindi na

Aalis

Gaano katagal na ba

Mula nung di makadinig

Dagundong ng bawat piga

Walang tigil na pagpintig

Ritmo ng aking kaba

Kabog ng dibdib

Patsadang kalma

Loob ay sabik

Kuno'y handa

Walang imik

Eto na.

Kilig

Kay tagal ng nabibingi sa ingay ng isip

Pag ikaw ang laman, kusang tumatahimik

Kay tagal ng lutang sa himpapawid

Kusang mahuhulog sa iyong mga bisig

Gaano katagal na ba

Mula nang naglakbay

Tayo lamang dalawa

Di mapagbitiw na kamay

Nakangiting kaluluwa

Saki’y nakadantay

Nagpapakalma

Iyong akbay

Sinabi ko na

Di masasanay

Habambuhay

Kay tagal ng ligaw sa mundong mapanakit

Sa piling mo lamang kusang bumabalik

Sa dami ng sakit, sa dami ng pagdurusa

Sa lahat ng pinilit, sayo lang ako nagkusa

Kabilugan

Para sa mga naghahanap ng mas ethereal na karanasan sa pagsamba, tingnan ang Young Oceans at ang kanilang pinakabagong album na You Are Fullness. Kung kailangan mo ng tahimik at meditative na lugar, perpekto ang You Are Fullness na ilagay sa background.

So, isang gabi nung 2019, habang naglalakad sa kahabaan ng mga lansangan ng Makati, gaya nang marami, naging senti lang ako nung nakita ko yung full moon. Hahaha. 

KABILUGAN

Nakulangan ba ako sa paliwanag

o nasobrahan ka lang ba sa liwanag?

Nasisilaw. Ako sa'yo'y nabubulag

Napupukaw mo ako at nabibihag

Ako nga yata ay inaangkin mo na

Napako na sa'yo aking mga mata

Nangangarap sana na maabot kita

Kahit alam kong napakalayo mo na

Para bang nahuhulog patungong langit

Sa iyo ay labis akong naaakit

Ngunit ako nga ba'y iyong mapapansin?

Hinihiling sana'y mahulog din sa'kin

Sa totoo lang ay sapat na talaga

na mamangha ako sa taglay mong ganda

Kahit alam kong di ka makakatabi

ngiti mo'y kumukumpleto sa'king gabi

Kanser

 

Ang The Black Parade ay ang ikatlong studio album ng My Chemical Romance, inilabas sa Estados Unidos noong Oktubre 24, 2006, ng Reprise Records. Ito ay isang rock opera na nakatuon sa isang lalaking namamatay dahil sa kanser, kilala bilang si 'The Patient,' at nagsasalaysay ng kanyang kamatayan, karanasan sa kabilang buhay, at pagninilay sa kanyang buhay.

So ito ay way back 2018. Mga panahon na nareignite yung passion ko sa bandang My Chemical Romance. Lels. Isa sa mga favorite kong track sa album nilang The Black Parade ay ang kantang Cancer. Dahil dito, naisipan kong gumawa ng Filipinized na version pero hindi paawit. Hahaha like sa kanila lahat ang konsepto at ideya, sa akin lang ay yung tagalog words at isang damdaming nagreresonate sa kanilang artistic na pag-eexpress sa kantang Cancer.

KANSER

Pwede bang lumayo ka muna, yan ang aking ibig

Kung ang ibig sabihin nito ay ang pagkuha mo ng tubig

Ang mga labi kong uhaw, namumutla at nanunuyo

Kaya sana'y ikuha mo ako ng tubig sa iyong paglayo

Kung maaari din tawagin mo si Nanay

Tulungan mo siyang tipunin lahat ng mga paborito kong bagay

Para kapag dumating na ang takdang oras ng pamamaalam

Sa huling pagkakataon man lang ay aking mabalikan

Pasensya na sa pagiging makasarili, pero ito na ang huli

Pasensya na kung di mapakali, masyado lang nagmamadali

Bago matigil ang aking paghinga, bago maubos ang dugong binubuga

Nitong puso kong dahan dahan pero siguradong bumibigay na

Pero di kita hahalikan, mga namumutlang labi'y natuyo na

Di kita hahalikan, hindi na para sa akin ang mga labi mong mapupula

Wag mo akong hahalikan, wag mo na sanang ipilit pa

Kasi ang pinakamahirap dito ay ang katotohanang iiwan kita

Pwede bang lumayo ka na, lumayo na ng tuluyan

Sa estado kong ito, di na ako kaaya aya tingnan

Wala ng buhay na natitira sa aking katawang nagtatakipsilim

Kaya kung ikaw ay magpapaalam gawin mo  na ng mataimtim

Kasi ang pinakamahirap dito ay ang katotohanang ika'y aking maiiwan

Na wala ka ng ibang magagawa kundi ako ay hayaan at pabayaan

Dahil ang aking pagkapit ay ang iyong kamatayan

At ang aking pagbitaw ay ang iyong kalayaan

Kaya sana naman ikaw na ang magpaalam kasi di ko kaya na ikaw ay aking iwan.

Alimpungat

 

Dalawang taon matapos ang Strange Effect, ang grupong Parisian ay bumabalik sa Half Asleep Half Awake, ang pangalawang album na magbabalik ng iyong pananampalataya sa rock. Paano? Sa pamamagitan ng isang pinagsanib na koleksyon ng mga napaka-tunog na hit, maliwanag na melodiya, at mga demonikong jam na magpapaapoy sa iyong mga daliri. At ang mga solo sa drum at gitara ay pina-infuse ng phaser. Isang album kung saan ang alkemya at mga eksperimento ay nagbibigay buhay sa kasabikan, kabangisan, at damdamin.

So itong tulang ito ay naisulat ko nung 2018 ba o 2019? Basta noon dun sa ilalim ng buwan at tala ng kalangitan nang isang madaling araw sa kanto ng mga kalye ng Amorsolo at Dela Rosa habang nag-aabang ng mga elementong nagpaparamdam mula sa Makati Med.

ALIMPUNGAT

Naaalala ko pa nang bumagal ang oras

Nadadala lamang ng mabagal na kumpas

Madamdaming komposisyon. Romantikong musika

Naaantig na emosyon sa pagkakataong kasama kita

Naaalala ko pa nang ang puso ko'y natunaw

Ang iyong mahika pag nasisilayan ka sa ilalim ng araw

Ang iyong ngiti, mga pananaw , at buong pagkatao

Aking mithi na ako't ikaw ay hindi magbabago

Naalala ko pa nang binulungan ako ng hangin

Para bang natutuwa, nagdidiwang na ikaw ay akin

Nagmula sa panaginip, natupad, nagkatotoo

Tiwala ang puso at isip na mahal kita at mahal mo ako

Ngayo'y nagbabalik ang pagbagal ng oras

Nang iyong sinasambit na pag-ibig mo'y kumupas

Ang puso ko'y nabibingi sa ingay ng isip kong malala

Sa lahat pa ng hiningi, bakit pa iyong pagkawala

Ang kumpas ng maestra di ko na masabayan

Ang dahas ng orkestra. Himno ng kaguluhan

Ngayo'y nagbabalik ang puso kong natutunaw

Unti-unting lumiliit, tuluyan nang nagugunaw

Ngayo'y nagbabalik ang pagbulong ng hangin

Parang naninisik na ulupong, nagbabanta sa akin

Paulit ulit nyang binabanggit ang iyong pangalan

Paulit ulit nananaig ang sakit na pinagdaraanan

Isang pangarap na nakamit, isang panaginip na totoo

Hindi mahanap kung bakit, hindi maiisip kung paano

Bakit kailangang magising agad sa katotohanang ito

Kung di matatakasan ang realidad, magpapaalam na lang ako

Ligaw

 

Ang Lost on You ay ang ikaapat na studio album ng Amerikanong singer-songwriter na si LP. Inilabas ito noong Disyembre 9, 2016, sa pamamagitan ng Vagrant Records sa Canada at ilang bansa sa Europa.

So one time, natuwa ako sa salitang "nakaratay". Di ko alam kung ano ba dapat ang ikakatuwa ko dun pero yung thought na parang nakataray? like rbf on. And thinking naka rbf ba ang mga taong nakaratay? Actually, di ko alam. Di ko rin naman nanaisin na magkaraoon ng taong nakaratay. Pero mula sa salitang ito, naging kataga, naging stanza, naging tula. 

LIGAW

Nagsimulang magwala sa simula nang tayo'y mawala

Di man lang makapaniwala ang diwang di makawala

Nabulag. Nalaglag.

Nabasag. Nabuwag. 

Napuno ng "huwag"

Isang tunay na duwag

Piniringang mga mata

Kinadenang mga paa

Nabihag ng pagkukulang

Ginapos ng kamangmangan

Bakit nga ba natutong ibaling ang tingin?

Bakit nga ba lumiko sa landas na tatahakin?

Ikaw na pinagmulan ng mga bagong dahilan

Ako na pinagbigyan lamang ng iyong kaawaan

Banayad mong mga kamay ang aking laging batid

Balabal ko'y iyong akbay, ang aking tanging silid

Sanhi ng kaningningan ng aking mga mata

Mithi na patutunguhan ng aking mga paa

Ikaw lang ang tititigan

Ikaw lamang ang patutunguhan

Ikaw lamang ang pipiliin sa bawat paghinga

Ikaw naman talaga. 

Ikaw naman dapat, di ba?

Nagbulag-bulagan ako.

Nagpakasasa sa pagnanasa. 

Nagpilay-pilayan ako.

Nagpaawa. nagpakasawa.

Sa iyo ang pangako, sa kanya nakatugon.

Sa iyo ang pagsuyo, sa kanya nakalingon.

Hindi man lang sumilip sa iyong pagmamasid

Hanggang sa panaginip di kayang maging manhid

Hindi man lamang tumanaw sa iyong pag-aalala

Hanggang sa pagpanaw ay lagi ko ng dala dala

Ang iyong kamalayan na dati'y walang bahid

Ang ating kamatayan na ako ang naghatid

Bakit nga ba pumikit?

Bakit nagpakaligaw?

Napuno na ng bakit ang aking bawat pagsigaw

Piniringang mga mata

Kinadenang mga paa

Di ko kayang makita

Di ko nais pumunta

Huling lakad ng ating matagal na pagsasama

Huling gunita ng ating napakaraming alaala

Nawala na ang iyong mga matang mapupungay

Natapos na ang ating sinimulang paglalakbay

Sana noon pa lang nakamulat na ang aking mga mata

Sana noon pa lang nakalapat na sa lupa ang aking mga paa

Bakit kailangan ko pang lumingon ngayong di ka na makita?

Bakit nais ko pang balikan ngayong di ka na kasama?

Mata ay hilam. talampakan ay malamig.

Wala ng pakiramdam. sa kawalan nakatitig.

Andito ako nakaratay

Dadalhin ko habambuhay

Nagsisisi sa pagbitay

Sa pag-ibig mong tunay

Tuldok-Kuwit

 

Ang Semicolon ay isang espesyal na extended play (EP) ng South Korean boy band na Seventeen. Inilabas ito ng Pledis Entertainment noong Oktubre 19, 2020.

So after ko mag-inarte at magdrama nung 2019 hanggang 2020 na hindi na ako muling susulat ng tula, hahahaha, edi sumulat ulit ako ng tula. So ito yung  nagawa ko matapos ang hiatus. Hiatus?! Char. hahaha. Pero nakaka-amaze kasi yung isang Filipino teacher na nagtuturo ng independent clause at dependent clause. Narinig ko kasi ang pagkakasabi niya na, "sugnay na di makapag-iisa". Tapos naisip ko, ang lungkot naman nun. Nabansagan na siya na di makapag-iisa. Huehue. Ang kanyang pag-iisa ay walang saysay? Like whaatt? Hahahaha. Anyway. Ito na siya:

TULDOK-KUWIT

Nagmula sa isang kislap

Apoy na sumiklab

Nagbuhat sa aking kamay na pagbuhatan na ng kamay

Sa pagsusulat, ako'y namulat

Na ako'y nakapikit kahit nakadilat

Mga tulang tulala

Panay pangungusap na nangungusap

Para bang nakikiusap

Naghahanap ng kausap

Para ba kanino inalay

Isang aninong walang malay

Isang bahagi ng kahapon

Sadyang palagi nililingon

Paano ba bumangon kung di naman nakahiga

Paano ba matutuyo kung wala ng mapipiga

Gaya ng  tinta nitong tula

Natuyong namumutla

Bahid ng paglipas

Hatid ay pagkupas

Akala ko titigil ang oras habang sinisiil ko ang nakalipas

Usapang nakaraan

Isang tulang binabalikan

Sa paghagod ng papel at pluma

Mayroong anghel na nagbunga

Higit pa sa marka ng tinta

Ang kanyang pagsinta

Bawat pantig ay pintig

Bawat titik ay sabik

Mga linyang nagkakabit

Mga talatang umaawit

Ngayo'y lirikong walang musika

Tinatanong kung sino ka

Pinaasang mga tugma ng dalawang hindi nagtugma

Natapos ang ugnayan

Pinutol na hugnayan

Ikaw na nakapag-iisa

At ako na nag-iisa

Di na maunawa

Naglaho na ang diwa

Tila isa ng parirala

Na sadyang naniniwala

na isang pagatnig lang naman ang kailangan

Di man lang namalayan

na ang pag-ibig pala'y isang tambalan

Ngayon ako'y naiwan

Dito sa kasukdulan

Sa pagbaba ng aksyon

Meron nga bang resolusyon?

Bababa nga ba ang aksyon

O sadyang rebolusyon

Susulat na ng nakamulat

Tapos na ang imahinasyon

Tapos na ang piksyon

Dating paghagod buhat ng ilusyon

Ngayo'y pagsusod ng may dirensyon

Di na muling magtatangka

Gawing biktima ang mga katha

Di na muling mananadya

Magdidikta ang mga salita

Bawat pintig ay pantig

Bawat sabik ay titik

Ipagdurugtong ang mga linya

Ibubugtong na ang mga talata

Sa aking huling pluma

Hanggang huling patak ng tinta

Di na ikaw ang may akda

Ako na ang magtatakda

Nostaldyik

 

Ang Nostalgia ay ang ikalimang studio album ng Amerikanong rapper na si Rod Wave, na inilabas noong Setyembre 15, 2023, ng Alamo Records.

So may nanghamon sakin noong 2021 ata or 2022 na sumulat ng tula na hindi naman tragic. Oo, siguro karamihan ng naisusulat ko ay may pagkatragic nga naman. So ito, sa tingin ko maaaring malumanay lang naman. Siya nga pala, wag nating kalimutan na ang salitang tragic ay relatibo lamang. Hahahaha. Anyway, ito na siya.

NOSTALDYIK

Nakita ka daw nila

Nakangiti. Masaya.

Kumusta ka naman pala

Wala pa ring pinag-iba?

Ako. Andito pa.

Nagtitimpi. Kinakaya.

Saan na ako pupunta?

Hayaan mo. Kaya ko na

Kapag naiisip ang iyong ngiti

Parang muling kinikiliti

Mga lihim nating mga senyas

Kinikimkim na mga bakas

Ang himig ng iyong tono

Kinikilig pa rin sayo

Ako'y iyong kinakabisa

Ikaw sa akin ay nag iisa

Ating aklat man ay may hantungan

Isang peklat na aking ipagyayabang

Kahit wala na sa aking tabi

Palagi kang nasa aking tabi

Kahit di kita mayakap

Palagi kang yakap yakap

Kahit di kita nakikita

Ikaw lang ang nakikita

Kahit di na kita minamahal

Ikaw lang ang minamahal

Di man umabot sa huling hantungan

Salamat at ika'y aking nadatnan

Kung di ka man magbabalik

Di ako iimik

Nakatatak na sa akin ang iyong halik

At kailanman di ko ipagpapalit

Ang pinagsamahan natin kahit isang saglit

Dahil sa sandaling ako'y naging iyo

Habambuhay na ang ibinigay ko

Ang Tagubilin

 

Second album ng American producer and rapper na si Jermaine Dupri ay ang Instructions

So. Hello blog. I am back. Since may time ako, magpopost ako ng mga naisulat ko mula nung last time na  huling nakapagpost ako dito. Hindi ko din sure kung anong nangyayari, pero feeling ko wala ako masyadong confidence as before? Or dahil ba mas tumatanda lang ako, at wala na akong passion di gaya nung mas bata pa ako. Hahahaha #OA. Anyway, sana maenjoy mo to.

ANG TAGUBILIN

Napanaginipan kita kagabi

Nakangiti ka sa aking tabi

Nakaakbay sa aking balikat

Nakadantay nang kay bigat

Ako'y kinakabahan pagkamulat

Halong pagkalito at pagkagulat

Aking sandigan, kaibigang tapat

Parang testigong magsisiwalat

Mahimbing na panaginip. Siguradong di makakalusot sa iyong kalasag

Sa maraming pagsagip, siguro nakalimot lang akong maging matatag

Hinding hindi maiisip na siguro bangungot ang aking napagmatyag 

Dahil sa dami ng paninikip siguradong iyong dulot sa akin ay pagluwag

Akong nakatalukbong sa kobre ng madidilim kong agam agam 

Ikaw ang nakaselyong sobre ng mga palihim kong liham

Akong nadadala sa ihip ng buhawi ng aking pag aalinlangan

Ikaw ang nagsasalba, nagsasagip, nagbibigay ng katahimikan

Ngunit bakit ganito. Ako'y iyong nililito

Di ko mapagtanto mga linyang binibitawan mo

Iyong huling salita na di ko malilimutan

Aking laging gunita na di ko maintindihan

"Wag ka munang kakapit kung kulang pa sa talim"

"Wag subukang sumabit dahil wala namang bangin"

"Wag kang lilingon sa baba, baka mawalan ka ng pag-asa

Ako na ang bahala, wala ka nang magagawa pa"

Naninikip na dibdib, ako'y nagpupumiglas

Parang nadakip sa liblib, ako'y hindi makatakas

Nanghihinang mga tuhod, ako'y napaluhod

Sa binitawang taludtod, tila ba nalulunod

Taas. Baba. Kaliwa. Kanan.

Aking mga diwa'y naguguluhan

Taas. Baba. Kaliwa. Kanan

Tama ba na ika'y aking pakinggan?

Ikaw na nasa kaibuturan ng aking mga paningin

Ikaw na nangingibabaw sa aking mga sasabihin

Ikaw na tinutularan ng buong puso't damdamin

Ikaw na nagbibigay linaw sa aking mga tatahakin

Pinapatawad mo ako sa mga hindi ko alam

Pinapatawa mo ako kapag ako'y nagdadamdam

Naghatid at naggabay patungo sa ating paraiso

Aking batid ay isabuhay lahat ng iyong mga abiso

Di ko alam kung tama, di ko alam kung mali

Pero sa aking pagkakaalala, di ka nagkakamali

Alam mo palagi ang aking hinahangad

Kaya naman palagi pilit kong tinutupad

Kung wala pang talim, ako ang magpapatalas

Kung wala ang bangin, ako ang tutuklas

Hindi lilingon sa baba. Hindi lilingon sa iba

Ikaw na ang bahala. Wala naman akong magagawa

Taas. Baba. Kaliwa. Kanan.

Ngayon di na mapakikinggan

Taas. Baba. Kaliwa. Kanan.

Saan ba kita matatagpuan?

Biglang isang araw, ikaw ay nawala

Nawalan ng linaw aking paniniwala

Ngunit panghahawakan ko ang iyong huling kataga

Walang pag-aalinlangan kaya ko itong magawa

Matalim na ang patalim.

Malalim na ang bangin.

Taas. Baba. 

Kaliwa. Kanan.

Handa na kumapit kahit masugatan

Taas. Baba.

Kaliwa. Kanan.

Hindi ako sasabit kahit walang hangganan

Taas. Baba.

Kaliwa. Kanan.

Hindi ba dapat lilingon hanggang sa kailaliman?

Taas. Baba.

Kaliwa. Kanan.

Hindi ba nangakong di mo ko iiwan?

Huling pagtaas.

Huling pagbaba.

Huling kaliwa.

Huling kanan.

Sa wakas ikaw ay aking natagpuan.

Nakadantay ng kay bigat.

Nakaakbay sa aking balikat.

Nakangiti sa aking tabi.

At muli mong sinabi,

"Kapag wala ka nang magagawa, ako na ang bahala"